Ang Pasko Sa Pinas

Kining maong grupo sa mga mananaygon ang usa sa daghang mga Pinoy nga nagpakita kung unsa ka talented ang mga Filipino, bisan didto sa mga yanong hut-ong sa katilingban, gikan sa mga kabus mo gawas gayod ang atong pagka-composer ug pagka-singer. Kini nagpa matuod nga kitang mga Pinoy luyo sa atong mga kalisod ug sa mga problema, ania na gyud sa atoang kinaiya ang pagka-malipayon.Nga gani kining maong mga tao naantigo mag compose ug kanta para lamang ilingaw sa ilang mga silingan ug mga kauban.

Sa ubang nasud dili ka makakita ug sama ug kinaiya natong mga Filipino nga gani sa matag lupad sa atong mga igsoon paingon sa abroad, inig abot ug pipila ka mga bulan anaa na dayon sila sa estado nga gitawag ug HOMESICK. Maong kada Desyembre naningkamot gayod sila nga manguli para matagamtam ang kalipay sa pagsaulog sa pasko nga dinhi lang gyud nila masinatian sa Pilipinas. Mao nga ako gyud nga personal nga gipili kining maong mga video haron usab madunggan gihapon sa mga Pinoy nga anaa sa layo ang mga yanong kanta sa atong mga igsoon panahon sa pasko sa ilang pagpanaygon, nga ang tumong ug tuyo niini nga dili nato hikalimtan ang simpleng pamaagi sa pagsaulog natong mga Pinoy sa adlaw sa pasko.

Ang isa sa pinaka-nindot nga lugar nga nailado gayod sa ilang paghatag ug Kinabuhi sa pasko mao ang Tangub City nga anaa sa Misamis Occidental sikbit nga siyudad sa Ozamiz City, dinhi mo dagsa ang mga turista aron lamang sa pagsud-ong sa mga nindot nga mga dekorasyon matag pasko nga giapilan sa tanang Barangay nga sakop maong siyudad. Naabtan pa namo ang pipila ka mga Christmas decoration sa dihang nagpahigayon kami ug conference niadtong April 12 hangtod April 14 tuig 2011, ug didto nako personal nga nakita ang kaanindot sa ilang gipangbuhat nga mga suga ug dekorasyon.

Ang pasko na siguro ang pinakanindot nga mga adlaw sa tibuok tuig nga atong gihulat, kay gusto na pod nato nga masinatian ang gugma ug pagpasaylo sa matag-usa. Ang paghatag ug regalo ug usab ang makadawat niini, gusto na usab nato makita ang nagkalainlain nga parol, lantern, Christmas lights nga mao na pod unya ang maghatag ug kahayag sa atong panimalay ug sa atong kadalanan. Busa alang kanatong tanan, sakto kini nga panahon aron kita maka pangamdam pag-ayo sa pagsaulog sa uamaabot nga pasko 2012, duha ka-adlaw na lang September na, ug sugod aning mga adlawa naghinam-hinam na usab kita nga atong madunggan ang mga kanta sa pasko nga ipa-tugtog sa nagkalainlaing estasyon sa radyo sa tanang dapit sa Pilipinas. It's more fun in the Philippines tungod kay lahi ta sa uban.