So.... mao to nalipay ko nga ma-transfer ko ug Compra...kay higway na man makakita na pod ko ug truck. Kay sa bukid baya wala gyuy truck makita didto sa Malila L ug sa Goin pod although may dako nga dala, kasagaran mo saka didto nga truck mga 6 by 6 nga truck kay maghakot ug kopras. Ug nadayon gyud ko ug transfer pagka Grade 2 nako sa Compra Elementary School, ug pagsugod sa klase alas-4 pa lang sa kadlawon magmata ug maligo kay para paghayag sa kalibotan sugod na mi ug baktas paingon sa Compra. lain pay ato...dili paghayag sa adlaw ang akong gigamit kay mohayag man ang kalibotan bisag wala pa mi-bidlisiw ang adlaw..hehehehehe. Siguro bana-bana nako mora ug 6 hangtod 7 kilometros siguro ang among baklayon kada buntag ug hapon para lang gyud maka-eskwela.
Usahay kung ulan paulion mo ug sayo sa among mga teacher kay para dili maabtan ug baha. Bibo pod mi kaayo kung mag-ulan...ibutang namo ang among mga notebook ug papel sulod sa cellophane dayon sulod sa among bag ga NET BAG, ang tsinelas ibutang sa duha ka bukton ug isuot ang strap, dayon lumbaanay dayon ug panagan pauli sa Malila. Ang pinaka-dako nga sapa nga among tabukan mao ang Bogatong (ambot sakto ba kaha ang spelling ani). Pag-abot namo didto..bibo na kaayo ug daghang mga ginikanan ga hulat sa pikas o sa atbang. Nagbutang na daan sila ug duha ka pisi, pisi sa tiil para among latayan ug pisi sa kamot para among gunitan. Usahay may mga estudyante pa nga ang bag mahulog ug ianod sa suba..pagka-looya sa mga bata.
Tibuok tuig sa akong Grade 2 mao toy among adlaw-adlaw nga buhaton, usahay kung ulan mo silong mi sa mga Purok sa mga Krosing ug didto na magsugod nga dili na mi usahay mo sulod sa klase tungod kay malingaw na mi magdula ug JOLEN o HOLE o MARBLE...hahahaha kamo na lang sabot ana. Usahay manghagdaw pod mi sa mga kamaiasan nga human na ug sanggi ug usahay mapuno ang among netbag sa nilubo nga hinagdaw nga mais. Ug mao toy hinungdan nga sa akong Grade 2 wala na gyud ko Ribbon nga mao gyud pangandoy sa akong mga ginikanan...Ang akong ma remember nga mga teacher sa una si Ma'am Tabanao man siguro to, Ma'am Boris ug dili nako malimtan nga classmate si Cynthia Nadala... (kapoy na man ug type sa lunes na pod pohon kay ugma leave ko....bye bye)
No comments:
Post a Comment