Dili nako malimtan nga during lunch time mosaka mi sa mga dagkong punoan sa mangga ug didto namo bukharon ang among balon, nga giputos pa sa dahon sa saging. Mais ang among balon ug mangalimyon ang kahumot inig abri namo niini, dayong lugit sa bulad nga nalubong didto sa luto. Bibo kaming mangaon kauban ang akong mga classmate samtang nagpatong sa mga dagkong sanga sa punoan sa mangga. Paghuman ug kaon among isuksok sa mga sanga sa mangga ang dahong giputos sa among balon. Manaog ug mangadto sa bomba para moinom ug tubig ug dayong dagan sa plaza para mo dula ug SIOKOK (kanang dula nga grupo-grupo nga maghimo ug balay tapos mag dakpanay ug ang madakpan himoong bihag ug dad-on sa balay). Kung dili siokok sipaanay sa tiil (syempre sa tiil jud ky sipa gud hehehe) kalaban usahay ang ubang grado.
Pero sulod sa duha ka tuig sa Grade 2 ug 3 wala jud ko naka honor, siguro dili nako home court. Kada semana lang ko nag-ulian ug Kayok diin didto na mi nagpuyo sa yuta sa akong Lolo nga Papa sa akong amahan. Nahuaman ko sa akong Grade 3 sa Compra ug pag abri sa sunod klase sa Kayok Elementary School na pod ko gi-enroll sa akong mga ginikanan.
Lahi nga environment na pod tungod kay naanad ko sa bukid ug karon ang akong kinabuhi gipalibotan na pod ug basakan, although may bunod pod nga among gi-uma isip saop. Ang nakanindot kay duol sa dagat, nga kung sa una sa suba sa molos mi manarap ug mamasol, diri sa Kayok sa katonggan na mi manarap ug mamasol.
Dinhi nako nakat-onan ang manguha ug lukon gamit ang troll, kanang kawayan nga gibutangan ug screen ug naay bulsa nga palutawon sa dagat. Manudsod ug isda sa katunggan ug ang manguha ug sisi nga namilit sa palwa sa nipa. Mo bira ug baling sa daplin para maka bahin ug isda ug manayong sa sakayan para tagaan ug isda nga dad-on sa among balay para sud-anon.
Karon nga naa na ta sa layong lugar ug walay dagat ma miss nako tong isda nga galangoy-langoy sulod sa baling. Ang bolinaw nga amo lang sikopon ug dretso kilawon human ug tusno sa tubig sa dagat. Ang lapad nga diwit nga kung dili kabalo mo dakop ma paakan ka. Ug niining maong gimbuhaton naningkamot ko nga makabalo nga molangoy tinabangan sa akong salbabidang bunga sa lubi nga boang nga akong gitapad.
Daghan pang nahitabo sa akong kinabuhi sa kayok nga maoy hinungdan sa akong pagpaningkamot..............
No comments:
Post a Comment